मंगलवार, १ असार २०७८
मंगलवार, १ असार २०७८

IT Training Nepal

कञ्चनपुरमा हुलाकी सडक निर्माणमा भारतको अवरोध

२३ असार, २०७७ ०२:३६ मा प्रकाशित

361 पटक पढिएको

ssb india obstructs infrastructure development in nepal

महेन्द्रनगर, २२ असार : कञ्चनपुरको दक्षिण क्षेत्रमा निर्माणाधीन हुलाकी सडक निर्माणमा भारतीय पक्षले पटक-पटक अवरोध गर्दै आएका छन्। भारतीय सुरक्षाकर्मीले कञ्चनपुरको बेलौरी नगरपालिका–८ पचुइ क्षेत्रमा निर्माण भइरहेको हुलाकी सडकमा उक्त क्षेत्र भारतको भू-भागमा पर्ने दाबी गर्दै निर्माण कार्यमा अवरोध गरेका हुन्।

‘बाटो खन्ने बेलामा पनि अवरोध गरे, सडकमा ग्राभेल गर्ने बेला पनि अवरोध गरे। अहिले सडक कालोपत्रे गर्न खोज्दासमेत निर्माणमा अवरोध पुर्‍याइरहेका छन्’, बेलौरी नगरपालिका–८ का वडाध्यक्ष नन्दकुमार रानाले भने, ‘सडक निर्माणको सुरुदेखि नै भारतीय पक्षले ४-५ पटक अवरोध गरिसके।’ सडक कालोपत्रे तयारी भइरहँदा आइतबार भारतीय सुरक्षाकर्मीसहित त्यहाँका स्थानीयले सडक निर्माणमा हस्तक्षेप गरेका हुन्।

साझ ५ बजेतिर उक्त क्षेत्रका डिएमसहित उच्च प्रहरी अधिकारी, भारतीय सञ्चारकर्मी र भारतीय नागरिक आई अवरोध पुर्‍याएको वडाध्यक्ष रानाले बताए। ‘हामीसँग लालपूर्जा भएको जग्गा भारतीय पक्षले आफ्नो दाबी गर्दै सडक बनाउन दिएका छैनन्’, रानाले भने, ‘३८ नम्बर पिल्लरदेखि अगाडि १२ सय मिटर भू-भाग भारतले आफ्नो दाबी गर्दै आएको छ।’

आफ्नै भूमिमा सडक बनाउँदा पनि भारतीय आएर सीमा विवाद भन्दै अनावश्यक झमेला गरेर सडक निर्माणमा अवरोध गरेको स्थानीयको भनाइ छ। उक्त क्षेत्रको निर्माणको जिम्मा पाएको निर्माण कम्पनीले अवरोधका कारण दुई दिनदेखि सडक निर्माण अघि बढ्न नसकेको जनाएको छ। जिपिएस नक्साबाट सडक निर्माणस्थल भारतको भूमिमा पर्ने दाबी गर्ने भारतीय पक्षले कञ्चनपुरको दक्षिणी क्षेत्रमा धेरै ठाउँमा नेपाली भूमि कब्जा गरेको र गर्न खोजेको उनको भनाइ छ।

सशस्त्र प्रहरी बल ३५ नम्बर गणका गणपति सशस्त्र प्रहरी उपरीक्षक वीरसिंह साहुले सडक अवरोधका विषयमा मंगलबार भारतीयसँग छलफल गरेर समाधान खोजिने बताए।

कञ्चनपुरको डोकेबजार–बेलौरी, बेलौरी बेल्डडाँडी र बेल्डाँडी दैजी खण्डमा विभाजन गरी ६२ किलोमिटर हुलाकी सडक निर्माण भइरहेको छ।


यो समाचार पढेर तपाईंलाई कस्तो लाग्यो ? प्रतिकृया दिनुहोस् ।

शेयर गर्नुहोस् ।

Divya Gyan College Eprabidhi Solutions webtrickshome